Rizoto me aragostë dhe shampanjë:
Përbërësit:
1 aragostë 600-800 g ose dy të vogla
250 g oriz për rizoto
2 gota shampanjë
1 qepë e ëmbël
70 g gjalpë
1lug majdanoz
1 litër lëng (të bërë me mbetjet e aragostës, qepë, karota, bishta majdanozi, 2 thelpinj hudhra)
kripë, piper të bardhë, në mungesë piper të zi
3-4 lugë vaj ulliri
Përgatitja:
Aragostën e gjallë hidheni të ziejë në ujë për 10 minuta. Hiqeni, lëreni të ftohet dhe merrni komplet tulin e saj, ruajeni mënjanë. Mbetjet e saj, d.m.th. gëzhuallin dhe pjesët e tjera vendosini të ziejnë me qepë, karota, hudhra dhe bishta majdanozi. Lërini të ziejnë derisa të bëhet një lëng i veshur.
Tani grini shumë imët qepën dhe vendoseni të kaurdiset me gjysmën e gjalpit dhe vajin, sapo të zbutet dhe të bëhet transparente shtoni orizin dhe skuqeni bashkë me qepën. Shuajeni me një gotë shampanjë, kriposeni dhe shtoni piper të bardhë. Kur shampanja të avullojë shtoni herë pas here lëng deri në zierjen optimale të orizit. Në mesin e gatimit të orizit, shtoni tulin e aragostës të prerë në copa të vogla dhe gotën tjetër të shampanjës. Kur të jetë gati hiqeni nga zjarri dhe lidheni me gjysmën tjetër të gjalpit, përziejeni mirë dhe shërbejeni me pak majdanoz të grirë sipër.
Comments